Shiva nel centru de too
- acueval83
- 12 ene
- 1 Min. de lectura
Nesta Inglaterra escomanada,
exótica y tropical;
tan ayena al entendimientu,
lo único ya indivisible
esnidia na superficie
y afata con cenices los deseos.
Asina ye que cabriolea Shiva
ente elefantes, saris
y pulcritud humana de pelo
azafranao
mientres s'encarna en monos
y homes de negocios.
Danza, pos, esti espectru desvaído
de lo eterno y lo sagrao, nesti caos
alloñáu a esperances
y certidumes
al cual impon-y
la so cadencia desenfrenada.
El so tercer güeyu
acesma industries,
baillarines errabundes,
rascacielos y templos
destruyendo, como siempres,
pa poder crear la nada y el tou.
Pero tamién esquita
la so presencia azulada
d'ente neños que xueguen cricket,
ordenadores, madres vaca, ferrocarriles
o ciudaes palaciegues
habitaes por placeres tallaos
en mármol.
Y equí mora esti ser divín
que la so esistencia
depende de quien
esto escribe pero que, sicasí,
ye real.
Comentarios